"Huma Quşu" Təhsilə Xeyriyyə Dəstəyi

Bildirdiyimiz kimi, dekabrın 7-də Beynəlxalq Muğam Mərkəzində “Huma Quşu” Təhsilə Yardım Fondu (Fond) tərəfindən “Huma Quşu: Xeyirxahliq və Cəsarət Bələdçisi” adlı xeyriyyə gecəsi keçirilib.

Tədbirdə dövlət və ictimai qurumların rəhbərləri, elm və mədəniyyət xadimləri, qazilər, magistr və tələbələr, Fondun dostları, təsübkeşləri və media təmsilçiləri iştirak edib.

Xeyriyyə gecəsində bilet və rəsmlərin satışı, eləcə də edilmiş ianələrdən 8500 manat toplanılıb. Vəsait qazilərin İT təhsilinə və aztəminatlı ailələrdən olan üç gəncin Fondun yeddi aktiv proqramından biri olan “Humayın Xəyaldan Gerçəyə Qrantı” müsabiqəsi çərçivəsində dəstəklənməsinə yönləndiriləcək. Qrantın ayrılması barədə qərar Fondun İdarə Heyətinin 2025-ci ilin yanvar-fevral aylarına təyin edilmiş və müsabiqənin müzakirəsinə həsr olunmuş üç iclasının yekununda veriləcək.

“Huma Quşu” Təhsilə Yardım Fondu Beynəlxalq Muğam Mərkəzinə, İ-ticket.az şirkətinə, tanınmış caz ustası Salman Qəmbərov və Bakustic Jazz qrupuna, musiqi ifaçıları İlhamə Qasımova və Rövşən Qəhrəmanova, “Arts Council Azerbaijan” təşkilatının rəhbəri Dadaş Məmmədova, eləcə də bütün tədbir iştirakçılarına xeyriyyə gecəsinə verdikləri əvəzsiz dəstəyə görə dərindən təşəkkür edir.

Fond və tədbir barədə ətraflı məlumat fondun veb-səhifəsindən https://humagushu.az/ əldə oluna bilər.