“Huma Quşu” Fondu sosial layihə müsabiqəsinin qalibi oldu

“Huma Quşu” Təhsilə Yardım Fondu Azercell-in “Həyatı daha dolğun edirik: qadınlara dəstək proqramı”nın qalibi olub. Qadınların ictimai həyatda fəallığının artırılmasına yönəlik sosial layihə müsabiqəsinin final mərhələsi baş tutub. Layihələrin dəyərləndirilməsi zamanı dayanıqlı, daha geniş sosial kütlələrə faydalı olan, eləcə də rəqəmsal inklüzivliyin təşviqinə, texnoloji həllər vasitəsilə həyat səviyyəsinin daha da yüksəldilməsinə töhfə verən layihələrə üstünlük verilib.

Müsabiqəyə təqdim edilən 30-dan çox layihədən seçim şərtlərini ən yaxşı əks etdirən 5 layihə finala vəsiqə qazanıb. Münsiflər heyətinin yekdil qərarı ilə qalib elan edilən 4 layihə arasında "Huma Quşu" Təhsilə Yardım Fondunun “Aztəminatlı ailələrdən olan istedadlı gənc qadınların bakalavr, magistr və PhD səviyyəsində STEM təhsilinə dəstək” proqramı da var.

Qeyd edək ki, müsabiqə nəticəsində əldə edilən 12 500 AZN məbləğindəki qrant Azərbaycanda və xaricdə STEM sahəsində bakalavr, magistr, PhD səviyyəsində təhsil alan və aztəminatlı ailələrdən olan qızlar üçün sərf ediləcək. Gələn ay elan ediləcək Humayın “Qızların STEM-də yüksəlişi” müsabiqəsinin qalibi olacaq 5 nəfər hər biri 2500 AZN məbləğindəki təhsil təqaüdünü qazanacaq.