Londonda Humay Quliyevaya həsr olunan xeyriyyə konserti keçirilib
Böyük Britaniyanın paytaxtında əslən Azərbaycandan olan, hazırda Londonda fəaliyyət göstərən tanınmış musiqiçilər Dr. Səbinə Rakçeyeva (skripka) və Dr. Günel Mirzəyevanın (piano) ifasında konsert keçirilib. “Şərqdən Qərbə” adlı konsert Beynəlxalq Qırmızı Xaç Komitəsinin keçmiş əməkdaşı Humay Quliyevanın qısa, lakin parlaq ömrünə, onun xeyirxahlıq və humanizm dolu xatirəsinə həsr olunub.
Humayın Londondakı dostlarının təşkilatçılığı ilə baş tutan konsert tanınmış bəstəkarların əsərləri səsləndirilib, video təqdimatlar nümayiş olunub, Humayın maraqlı həyat yolu, təhsilə sadiqliyi və humanitar dəyərlərə bağlılığını əks etdirən çıxışlar dinlənilib.
Konsertin Londondakı “World Heart Beat Embassy Gardens” binasında keçirilməsi Huma Quşu Təhsilə Yardım Fondu ilə “World Heart Beat” arasında vacib əməkdaşlıq üçün bir körpü yaradıb. Bu tərəfdaşlıq hər iki təşkilatın məqsədləri arasındakı sinerjini əks etdirir – az gəlirli ailələrdən olan gənclərə imkan yaratmaq, istedadlı şəxsləri dəstəkləmək və mərhəmət, mentorluq və musiqinin dəyişdirici gücü kimi ortaq dəyərləri birləşdirmək.
Tədbir müxtəlif təbəqələrdən olan gənclərin musiqi istedadını inkişaf etdirən “World Heart Beat” xeyriyyə təşkilatında keçirilib. Musiqi təhsili proqramları və performans platformaları vasitəsilə World Heart Beat gənc ifaçılara sənətlərini, özünəinamlarını və yaradıcılıqlarını inkişaf etdirmək üçün şərait yaradır. Konsert zamanı təşkilatın baş icraçı direktoru Ceyms Gero çıxış edərək xeyriyyə təşkilatının missiyası və onun gənc musiqiçilərin formalaşmasına verdiyi mühüm töhfələrdən danışıb.
Konsertin konsepsiyası, bədii rəhbərliyi və açılış çıxışı Humayı yaxından tanıyan görkəmli skripka ustası Dr. Səbinə Rakçeyevaya məxsusdur. Musiqi axşamı boyunca onun baxışı Şərq və Qərb musiqi ənənələrini birləşdirərək səmimi və dərin mənalı bir musiqi körpüsü yaradıb.
Konsertdə iştirak edən Azərbaycan Respublikasının Böyük Britaniyadakı Səfirliyinin nümayəndələri Azərbaycanla beynəlxalq ictimaiyyət arasında əlaqələri gücləndirən mədəni və humanitar təşəbbüslərin əhəmiyyətini vurğulayıblar.
Humayın xatirəsini yaşatmaq və işini davam etdirmək məqsədi ilə təsis edilən Huma Quşu Təhsilə Yardım Fondunun prezidenti, Humayın anası Şəhla Vəzirova öz çıxışında musiqiçilərə və təşkilatçılara, eyni zamanda fondun fəaliyyətinin genişlənməsinə töhfə verən bütün donor və dəstəkçilərə minnətdarlığını bildirib.
Azərbaycanda və xarici ölkələrdə istedadlı gənclərin təhsilinə dəstək verən Huma Quşu Təhsilə Yardım Fondu 2022-ci ildə Humayın ailəsi tərəfindən təsis edilib. Fond az gəlirli ailələrdən olan istedadlı tələbələrə bakalavr, magistr və doktorantura təhsili üçün təqaüd və qrantlar ayırır, mentorluq və inkişaf proqramları ilə onların məqsədlərinə çatmasına yardım edir. Qarabağ müharibəsi veteranlarına informasiya texnologiyaları və digər bazar yönümlü ixtisaslar üzrə təlimlərin təşkili də Fondun fəaliyyətinin prioritet istiqamətlərindən birini təşkil edir.
Fondun fəaliyyəti tam şəkildə könüllülər tərəfindən həyata keçirilir və onlar Humayın fədakarlıq, təhsil və sosial təsir irsini yaşatmaqda davam edirlər. Fondun təşəbbüsləri Humayın Beynəlxalq Qırmızı Xaç Komitəsində yeddi illik fəaliyyəti dövründə qazandığı şəxsi vəsaitləri, eləcə də onun xeyirxah missiyasını dəstəkləyən donorların ianələri hesabına maliyyələşdirilir. Konsertdən əldə olunan bütün gəlir Huma Quşu Təhsilə Yardım Fondunun hesabına köçürüləcək.
Qeyd edək ki, konsert Azərbaycan və beynəlxalq icma üzvlərini bir araya gətirərək Humayın mərhəməti, zəkası və daim yaşayan xatirəsi ilə bağlı dərin duyğularla dolu təsirli, unudulmaz bir axşam yaşadıb.
